Data buku kumpulan puisi
Judul : Ayu Kita Baturai Pantun
Penulis : Syamsiar Seman
Cetakan :
3, 2008 (cet. I: 2004)
Penerbit :
Lembaga Pendidikan Banua, Banjarmasin.
Tebal :
vi + 69 halaman (65 judul pantun bahasa Banjar)
ISBN :
979-15063-1-9
Gambar sampul : Kambang malayap, salah satu
motif baru kain tradisional Banjar Sasirangan.
Beberapa pilihan pantun berbahasa Banjar karya Syamsiar Seman dalam Ayu Kita Baturai Pantun
Panginangan
Ka Kandangan ampah ka hilir
Isuk kaina ka Pulaihari
Panginangan baukir-ukir
Paninggalan urang bahari
Mananam sarai talu rapun
Imbah mananam bulik sanja
Baisi sirih talu lungkun
Ada kapur lawan gambirnya
Mangaut nasi baapik-apik
Jangan takipai atau tahambur
Pinang-pinangnya sudah baracik
Timbakunya gasan basusur
Bamandi-mandi bapapai mayang
Nitu adatnya pangantin puga
Nini kami rajin manginang
Umanya galuh manginang jua
Anak itik nginum mancucur
Anak tadung anak puraca
Rahat manginang lalu bakucur
Paludahan gangsa wadah kucurnya
Nyamannya nasi lauk saluang
Tambah kuahnya gangan waluh
Bibir habang imbah manginang
Urang panginang giginya kukuh
Barakat Cangkal
Iwak papuyu si iwak samu
Iwak sapat jadi pakasam
Cangkal balajar pakulih ilmu
Pangatahuan sagala macam
Wadai surabi apam batil
Disusun-susun dalam baki
Cangkal bagawi pakulih hasil
Pangalaman lawan rajaki
Tatudung saji gasan manukup
Manukup iwak sawadah nasi
Ilmu dunia basangu hidup
Ilmu akhirat basangu mati
Tulak maunjun ampah ka hilir
Pakulih iwak sampai salawi
Urang nang cangkal kada pangulir
Supan mainta kada bagawi
Karantukal buahnya jambu
Buah bilaran buah rumbia
Barakat cangkal mangaji ilmu
Kapintaran mambuang hina
Buah bangkal buah durian
Kulit durian banyak baduri
Amun cangkal lawan gawian
Musti ada datang rajaki
Utuh Tulak Bagarit
Mambawa kambang tabulirit
Kambang harum gasan randaman
Kada nyaman-nyaman tulak bagarit
Masuk hutan ka luar hutan
Banyu karuh laruh ka hilir
Banyu dalam lantaran pasang
Tagal si Utuh sudah tamahir
Mambawa tumbak mambawa parang
Punduk di kabun batawing kajang
Gasan kubungnya hatap rumbia
Bukah lajang manyasah kijang
Pusa, pilanduk ditangkapnya
Tabang buluh rabah ke lubak
Lucak mancurat takana kaca
Amun si Utuh rahat manumbak
Gancang banar tawakannya
Papan nipis papan kalipik
Tuntung disusun buat ka jukung
Pakulih bagarit dibawa bulik
Dibagi-bagi ka urang kampung
Guring bagantung burung sarindit
Inya bagantung di kayu madang
Nang ngaran Utuh harat bagarit
Kijang Alas digalari urang
Batatangguhan
Gula putih dibagi-bagi
Nang dibagi sawalas kilu
Amun ditatak batambah tinggi
Ayu tangguh nangapa nitu?
Digantung widai susun babaris
Amun tasalah andaknya pirut
Ada wadai rasanya manis
Amun diigut, inya maigut
Manggis masak kulitnya hirang
Imbah dibalah isi bahapat
Makan di parut, kaluar di balakang
Tangguh jua, siapa dapat?
Sapiring jubung makan katupat
Sampai tahingus, sambalnya padas
Daunnya ganal, akarnya ampat
Daun di bawah, akar di atas
Kain kandal sambilan dapa
Tuntung dikambit diulah tilam
Makan di kapala, mambuang di kapala
Ayu tangguh tahukah ikam?
Ada gulanya, sasikat pisang
Baulah kulak atau sarawa
Gawiannya gasan urang
Gasan inya kada kawa
(Jawab: salawar panjang – wadai basamut –
katam kayu – kalambu gantung – kutu kapala – tukang gunting)
Adat Istiadat
Bajual nasi sambil bajaja
Gasan makan baisukan
Duduk di kursi, batis di mija
Nitu parigal nang kada supan
Banih diudak lawan warangan
Gasan maracuni hama tikus
Jangan baludah nang sambarangan
Mintu jua mamaus hingus
Iwak basah dijamur karing
Imbah karing buat ka rantang
Jangan tabiasa bagandang tawing
Ujar nini mangiau hutang
Paikat ganal iya wilatung
Ditatak dua, diricih tiga
Amun manguap tukupi muntung
Jangan hangkui amun mariga
Bilah kandang dibaris tatal
Gasan palangnya kayu palawan
Jangan duduk di atas bantal
Ujar datu kaina bisulan
Burung katutut tarabang ka sarang
Makanannya banih pirukat
Amun bakantut tangah urang
Nitu ngarannya kada baadat
Katupat Kandangan
Mangatupat yu!
Puruk baju pasang kupiah
Tapihnya hanyar, tapih kaling
Talu bigi dibalah-balah
Bajubung isinya dalam piring
Hirang putih burung anggang
Basarang tinggi di kariwaya
Iwak haruan nang bapanggang
Pilih nang ganal kapalanya
Hadangan hirang panjang tanduk
Banyalam-nyalam di talaga
Kuah santannya talu sanduk
Tambahi pulang lawan lamaknya
Manimbuk jalan andaki piai
Timbuni pulang lawan karangan
Sambal lumbuknya bacampur binjai
Padas bangat, tagal nyaman
Amun bajajak di tangah licak
Kaina licaknya takana batis
Katupat nitu dikacak-kacak
Suap tarus sampai habis
Handak tulak ka Sungai Buluh
Singgah dahulu di Kasarangan
Tuntung makan limbui paluh
Hangkui mariga kakanyangan
Kalalapun Martapura
Ituk japun di muhara
Ada anaknya dalapan ikung
Kalalapun Martapura
Sabigi ganal kaya bal pimpung
Itik japun bisa tarabang
Amun tarabang tatinggal anak
Asal galapung bagula habang
Nyiur baparut batambah lamak
Disangka tadung sakalinya walut
Amun walut ngalih dijarat
Baingat-ingat amun maigut
Igut bakajut isinya mancurat
Tahukah nyawa kura-kura?
Inya bukah ampah ka kabun
Amun tulak ka Martapura
Musti nukar kalalapun
Banyak kawannya iwak pada
Inya bakunyung jauh-jauh
Wadai lainnya masih ada
Wadai cingkaruk, lupis bajuruh
Pitung ikung itik surati
Handak disumbalih gasan dipanggang
Patah bakuah, kakicak bahinti
Ada lamang, hintalu pindang
Apam Barabai
Kada hayam sambarang hayam
Hayam putih di halaman
Kada apam sambarang apam
Apam Barabai rasanya nyaman
Tatak sadapa batang paring
Sandarakan di tawing halat
Handak manukar, rasai sabuting
Imbah marasai balalu nyanyat
Di pucuk pinang ada upih
Mayangnya basusun balapis-lapis
Ada nang habang ada nang putih
Sama haja rasanya manis
Duduk-dudukan parak sanja
Duduk bakumpul di palatar
Haraganya nang murah haja
Barataan urang kawa manukar
Burung hantu si katutupi
Hinggapnya di puhun palam
Nginum banyu tih atawa kupi
Kada cukup kada baapam
Tinggi-tingginya pucuk rambai
Tinggi lagi pucuk galam
Balum langkap ka Barabai
Amun kada manukar apam
Balulucuan
Tulak ka hulu handak manabas
Nang ditabas kumpai tarandam
Manukar banyu tih sagalas
Tagal baduduk maniga jam
Lantai ambin hanyar disikat
Kawa baduduk sambil basila
Kasana-kamari bapandir harat
Kada tahunya ruku mainta
Jalan salisih sambil bagiting
Kaya kapiting pusing kiwa
Mamakan pais lima buting
Wayah babayar bapadah dua
Tahukah ikam buah gitaan?
Layapannya di atas batang
Pamandiran baduit jutaan
Sakalinya sabaik baisi hutang
Bamamasakan nasi karau
Amun karau kuahi banyu
Manawarakan ubat panau
Inya saurang panau di gulu
Hayam jagau babalang habang
Wayah halusnya anak piak
Dikira jagau bakacak pinggang
Sakalinya babisul di katiak
Utuh Tulak Malunta
Banyu bajarang jangan tajapai
Kalu luyuh takana kuku
Jukung halus turun ka sungai
Lunta panjang sahan di bahu
Jangan barabah ka padang dadak
Di situ batungau di situ bahama
Sampai di tangah jukung bacandak
Utuh badiri maangkat lunta
Siapa bisa maulah gangan
Ada jagung karawila
Awak bigas, ganal pagalangan
Saling gancangan manimbai lunta
Paring halus tantaran unjun
Paring nang ganal gasan pancuran
Lunta takait, Utuh batajun
Inya banyalam saling lawasan
Di pahumaan ditanam banih
Di pamatang ditanam limau
Bulik malunta banyak pakulih
Iwak sanggang, iwak kalabau
Manatak buluh diukur rata
Manajak tihang nang basuai
Saban hari Utuh malunta
Mangayuh jukung ka tangah sungai
Tentang Syamsiar Seman
Drs. H. M. Syamsiar
Seman lahir di Barabai, 1 April 1936. Lulusan Fakultas Sosial Politik
Universitas Lambung Mangkurat. Pernah menjadi guru sampai Kepala Sekolah
(1960), bekerja di Pemerintahan Provinsi Kalsel (purna tugas 1992), dan dosen
di beberapa perguruan tinggi. Pernah mengasuh ruang seni budaya daerah RRI
Nusantara III Banjarmasin (1977-1988). Menerima Piagam dan Hadiah dari Gubernur
Kalsel dalam bidang sastra tahun 1977. Menulis puisi, cerpen, artikel seni
budaya, yang tersebar di berbagai koran dan majalah. Menulis puluhan buku cerita
rakyat Kalimantan Selatan dan banyak hal tentang kebudayaan Banjar. Antologi
puisinya al: Taman si Muslim Kecil
(Puisi anak-anak Islami, penerbit djambatan, Jakarta, 1978), Tanah Habang (puisi bahasa Banjar,
2005), Anak Indonesia Gemar Berpantun
(1996).
Catatan
Lain
Dalam pengantar,
disebutkan bahwa buku ini mengalami beberapa kali metamorfosis. Awalnya
berjudul Urang Banjar Baturai Pantun,
berisi 50 judul pantun, di tahun 2000. sampai cetakan ketiga tahun 2003.
Berikutnya berkembang menjadi 60 judul pantun, dan diberi judul Ayu Kita Bapapantunan pada 2004. Tahun
2008, memasuki cetakan ketiga dan judulnya diubah lagi menjadi Ayu Kita Baturai Pantun, dengan maksud
untuk lebih mengenalkan istilah “baturai”, dan isinya bertambah menjadi 65
judul pantun.
Saya belum pernah berbincang dengan
beliau, tapi pernah beberapa kali bertemu, wajahnya tidak asing bagi saya.
Dalam kegiatan aruh sasra di Amuntai, dengan gigih beliau membuka stand sendiri
dan berjualan buku-buku karangan sendiri. Inilah segelintir orang yang cangkal
memperkenalkan ragam budaya Banjar melalui buku-buku. Dan saya pikir, saya
cukup sentimentil jika berkaitan dengan orang ini, beliau setanah kelahiran
dengan saya. Barabai. Semacam ada romantisme yang sulit dikatakan. Entahlah.
Itu juga saya rasakan dengan penyair kelahiran Barabai lainnya, Arsyad Indradi,
Ali Syamsudin Arsi, Helwatin Najwa, dll.
Oya, buku ini merupakan koleksi Y.
S. Agus Suseno. (Sepertinya yang beli sang isteri, ada prasasti semacam ini di
halaman pertama buku: Fuji Hidjriyati,
M.Pd, 140209/Sabtu). Saya sempat mempertimbangkan pemuatan buku ini di blog
saya, karena soal bahasa. Tapi saya pikir, justru itu bagus, inilah khazanah
kekayaan Nusantara. Karya Sastra Nusantara tidak harus berbahasa Indonesia. Bahasa
Daerah pun bisa dipakai menjadi pengantar dari sebuah karya sastra yang luar
biasa. Bagi yang tak paham bahasa Banjar, ini sebuah tantangan untuk mencari
tahu. :D
Tidak ada komentar:
Posting Komentar